ក្រុមហ៊ុនសហគ្រាសប៉េប៉េអឹម-ខនហ្វីរេលសម្ពោធមជ្ឈមណ្ឌលកែច្នៃចំណីអាហារ និងនរានុវត្តន៍ រួមជាមួយនឹងមន្ទីរពិសោធន៍គុណភាព Labiocert

កាលពីថ្ងៃទី២៥ ខែកុម្ភៈ ឆ្នាំ២០២៥ កន្លងទៅនេះ ក្រុមហ៊ុនសហគ្រាសប៉េប៉េអឹម-ខនហ្វីរេលបានសម្ពោធដាក់ឱ្យប្រើប្រាស់ជាផ្លូវការនូវមជ្ឈមណ្ឌលកែច្នៃចំណីអាហារ និងនរានុវត្តន៍ រួមជាមួយនឹងមន្ទីរពិសោធន៍គុណភាព Labiocert។ ពិធីនេះបានប្រព្រឹត្តទៅក្រោមអធិបតីភាពរបស់លោកជំទាវចម និម្មល រដ្ឋមន្រ្តីក្រសួងពាណិជ្ជកម្ម លោកឧកញ៉ាឱសថបណ្ឌិតហៃ លីអ៊ាង ប្រធានអគ្គនាយកក្រុមហ៊ុនប៉េប៉េអឹម-ខនហ្វីរេល ឯកឧត្តម លោកជំទាវតំណាងក្រសួងពាក់ព័ន្ធ រួមទាំងអង្គទូតនានាប្រចាំនៅប្រទេសកម្ពុជា តំណាងស្ថាប័នមកពីវិស័យឯកជន និងដៃគូពាណិជ្ជកម្មរបស់ក្រុមហ៊ុនប៉េប៉េអឹម-ខនហ្វីរេល។

ក្នុងឱកាសនោះដែរ លោកឧកញ៉ាឱសថបណ្ឌិតហៃ លីអ៊ាង មានប្រសាសន៍គូសបញ្ជាក់ពីកិច្ចសន្យារបស់ក្រុមហ៊ុនគឺការកែច្នៃផលិតផលបុរាណខ្មែរឱ្យក្លាយទៅជាផលិតផលដែលមានគុណភាពខ្ពស់ មានសុវត្ថិភាព​ និងល្អសម្រាប់សុខភាព សម្រាប់អ្នកប្រើប្រាស់នៅជុំវិញពិភពលោក។ លោកបន្តទៀតថា មជ្ឈមណ្ឌលកែច្នៃចំណីអាហារថ្មី និងមន្ទីរពិសោធន៍គុណភាពដើរតួនាទីសំខាន់ណាស់ក្នុងការធានាឱ្យមានគុណភាព និងសុវត្ថិភាពគ្រប់ផលិតផលក្រុមហ៊ុនខនហ្វីរេល។ លោកក៏មិនភ្លេចបង្ហាញពីសមិទ្ធផលថ្មីចុងក្រោយរបស់ក្រុមហ៊ុនផងដែរ។ នោះគឺម្សៅប្រហុកដែលជាគ្រឿងផ្សំដ៏មានប្រយោជន៍ច្រើនយ៉ាងសម្រាប់ចម្អិនអាហារបែបខ្មែរ និងបែបបរទេស។

លោកជំទាវរដ្ឋមន្រ្តីក្រសួងពាណិជ្ជកម្មបានកោតសរសើរចំពោះគំនិតច្នៃប្រឌិតរបស់លោកឧកញ៉ាឱសថបណ្ឌិតហៃ លីអ៊ាង និងបានគូសបញ្ជាក់ពីសារសំខាន់នៃមជ្ឈមណ្ឌលកែច្នៃចំណីអាហារក្នុងការចូលរួមចំណែកលើកកម្ពស់សុវត្ថិភាពចំណីអាហារ ការច្នៃប្រឌិត និងលើកកម្ពស់ផលិតផលខ្មែរទាំងនៅលើទីផ្សារក្នុងស្រុកក៏ដូចជាលើឆាកអន្តរជាតិ។ លោកជំទាវបន្ថែមទៀតថា គំនិតផ្តួចផ្តើមនេះនឹងចូលរួមពង្រឹងវិស័យឧស្សាហកម្មកែច្នៃចំណីអាហារនៅកម្ពុជា។

មជ្ឈមណ្ឌលកែច្នៃចំណីអាហារ និងនរានុវត្តន៍ផ្តោតសំខាន់ទៅលើការកែលម្អសុវត្ថិភាពចំណីអាហារ ជំរុញលើកទឹកចិត្តឱ្យមានគំនិតច្នៃប្រឌិត និងផ្សព្វផ្សាយលើកកម្ពស់ផលិតផលខ្មែរនៅលើទីផ្សារក្នុងស្រុក និងក្រៅស្រុក។ ចំណែកឯមន្ទីរពិសោធន៍គុណភាព Labiocert ដែលបំពាក់ដោយគ្រឿងបរិក្ខារ និងបច្ចេកទេសទំនើប និងក្រុមការងារដែលមានសមត្ថភាពខ្ពស់ ធានាបាននូវការវិភាគត្រឹមត្រូវជាក់លាក់អាចទុកចិត្តបាន ស្របតាមស្តង់ដារជាតិ និងអន្តរជាតិ។

ក្នុងឱកាសបើកសម្ពោធនោះដែរ​ អ្នកចូលរួមទាំងអស់អាចភ្លក្សអាហារ និងភេសជ្ជៈជាច្រើនមុខ ដែលកែច្នៃថ្មីៗចេញពីផលិតផលរបស់ក្រុមហ៊ុនខនហ្វីរេល មានដូចជា​ភីហ្សា និងស្ពាហ្គេទី (spaghetti) ដាក់ប្រហុកម្សៅ មានប្រហុកខ្ទិះ​ ចម្អិនដោយចុងភៅមកពីសណ្ឋាគារ Penh House និងស្រាក្រឡុក Jaya ក្រឡុក​ដោយ​អ្នក​ជំនាញមក​ពីក្រុមហ៊ុន KOFI ដែលសុទ្ធសឹង​ជា​ដៃគូរបស់ក្រុមហ៊ុនខនហ្វីរេល។

លោកជំទាវរដ្ឋមន្រ្តីក្រសួងពាណិជ្ជកម្មបានជំរុញលើកទឹកចិត្តភាគីពាក់ព័ន្ធទាំងអស់ឱ្យសហការគ្នាដើម្បីអភិវឌ្ឍ​ និងកែលម្អភាពទាក់ទាញនៃវិស័យម្ហូបអាហារនៅកម្ពុជា។ ម្យ៉ាងវិញទៀត លោកជំទាវក៏បានសង្កត់ធ្ងន់ទៅលើសារសំខាន់នៃការការពារកម្មសិទ្ធិបញ្ញា ការសហការជាមួយដៃគូពាណិជ្ជកម្មថ្នាក់ជាតិ និងថ្នាក់អន្តរជាតិ និងការចូលរួមតាំងពិព័រណ៍ពាណិជ្ជកម្ម ចូលរួមបេសកកម្មពាណិជ្ជកម្ម៕